Ֆրանչիսկոս Սրբազան Քահանայապետի 28 հոկտեմբերի քարոզը` ''Յիսուսն է որ Եկեղեցին կը կառուցէ
ու չի նայիր մեր մեղքերուն''։
(Ռ.Վ. 28 հոկտեմբեր 2014) ''Երկու հազար տարիներ առաջ Յիսուսն է որ կազմեց Եկեղեցին
ընտրելով տասներկու սիւներ ու ինքզինք դնելով որպէս անկիւնաքար'', ըսաւ Ֆրանչիսկոս Պապը,
երեքշաբթի առաւօտեան Տոմուս Սանթա Մարթայի մատրան մէջ մատուցած սուրբ պատարագի ընթացքին
արտասանած քարոզին մէջ։Այդ եկեղեցին ապա իր դռները բացաւ բոլորին անխտիր, որովհետեւ Քրիստոսին կը հետաքրքրէ սիրել եւ սիրտերը բուժել ու ոչ թէ մեղքերը հաշուել։
Մեկնաբանելով օրուան սուրբ գրային ընթերցումները ուր կը խօսուի առաքեալներուն կոչումի մասին, Նորին Սրբութիւնը մատնանշեց թէ ինչպէս Յիսուս նախ քան զանոնք կոչելը աղօթեց ու ապա զանոնք ընտրեց եւ ուղարկեց առաքելութեան։ Յիսուս կ՛աղօթէ, Յիսուս կը կանչէ, Յիսուս կ՛ընտրէ, Յիսուս իր աշակերտները կ՛առաքէ եւ Յիսուս կը բուժէ ամբոխը։ Ան յառաջ կը տանի Եկեղեցին զոր հիմնեց առաքեալներուն վրայ որոնք ամէնքն ալ մեղաւորներ էին։ Ոչ միային Յուդան այլ ամէնքը, որոնք ապա փախուստ տուին Յիսուսի չարչարանքներու ժամանակ։
Յիսուս կ՛ուզէ որ մենք ըլլանք Եկեղեցւոյ մէջ, ոչ թէ որպէս հիւրեր կամ օտարականներ այլ քաղաքացիի իրաւունքով։ Եկեղեցւոյ մէջ մենք արմատացած ըլլալու ենք։ ''Մեր կեանքը հոն է'' հաստատեց Քահանայապետը, հրաւիրելով Քրիստոնեաները մաս կազմել Եկեղեցւոյ կառուցումի աշխատանքին ու չմնալ Եկեղեցւոյ սեմին։
''Յիսուսին համար կարեւոր չէ Պետրոսին մեղքն ու դաւաճանութիւնը'', ըսաւ հուսկ քահանայապետը քարոզին աւարտին, ''Ան կը փնտռէ սիրտը ու այդ սիրտը գտնելու եւ բուժելու համար Յիսուս աղօթեց։ Յիսուս կ՛աղօթէ մեզմէ ամէն մէկուն համար ու մենք կարող ենք Եկեղեցին հասկնալ մեկնելով Յիսուսի աղօթքէն։ ''Թող Սուրբ Հոգին մեզի հասկցնէ Յիսուսին մեզի համար կատարած աղօթքին զօրութիւնը որ կարող է բուժել զմեզ ամէնքս'' եզրափակեց Ֆրանչիսկոս Պապը։
| All the contents on this site are copyrighted ©. |